Русский 
English ՍՆՆԴԱՄԹԵՐՔԻ ԱՆՎՏԱՆԳՈՒԹՅՈՒՆ
Սննդամթերքում մնացորդային նյութերի հայտնաբերման բաժին
Սննդամթերքի անվտանգության հետազոտությունների լաբորատորիայի սննդամթերքում մնացորդային նյութերի հայտնաբերման բաժինը հագեցված է ժամանակակից գերճշգրիտ սարքավորումներով (GC-MS/MS, LC-MS/MS, AAS, IR-MS), բազմաթիվ տեղական և միջազգային վերապատրաստումների փորձ ունեցող պրոֆեսիոնալ անձնակազմով: Բաժնում իրականացվում են պարենային հումքի, կենդանական և բուսական ծագման սննդամթերքի և կերերի լաբորատոր փորձարկումներ համաձայն ԵԱՏՄ և ազգային կանոնակարգերի պահանջների, պատվիրատուի ներկայացրած ՏՊ-ների, ինչպես նաև լաբորատորիայում մշակված և վավերացված (վալիդացված) մեթոդների:
Սննդամթերքում քիմիական աղտոտիչների ( թունաքիմիկատներ, հումքի մշակման ժամանակ օգտագործվող աղտոտիչներ, արտաքին միջավայրի աղտոտիչներ, անասնաբուժական դեղերի մնացորդներ) մնացորդային քանակների հայտնաբերման փորձարկումները իրականցվում են միջազգային ստանդարտներով նախատեսված և կահավորված լաբորատոր պայմաններում: Գերճշգրիտ և հիմնականում ավտոմատացված սարքավորումները ինչպիսին են՝ միկրոալիքային վառարանը, ավտոմատացված լուծամզման (էքստրակցիոն) և մաքրման համակարգերը, ավտոմատ նմուշի ներարկման հնարավորությամբ և տարբեր նշանակության գերզգայուն դետեկտորներով հագեցված անալիտիկ սարքավորումները հնարավորություն են տալիս միաժամանակ փորձաքննության ենթարկել 24-150 փորձանմուշներ, նվազեցնում են մարդկային գործոնի ազդեցությունը՝ բարձրացնելով արդյունքների ճշգրտությունը և հավաստիությունը:
Այս բաժնում նույնպես կիրառվում են բացարձակ բարձր մաքրության քիմիական նյութեր, անալիտիկ ստանդարտներ, միջազգային մասնագետների կողմից ստուգաչափված սարքավորումներ: Այսօր լաբորատորիան ունի մի շարք առաջնային ծրագրեր, որոնցից կարևորվում է խաղողի հումքով ալկոհոլային խմիչքների նույնականացումը և ՀՀ-ում ալկոհոլային խմիչքների հումքի իզոտոպային կազմի բանկի վարման նպատակով իզոտոպային հետազոտություններ իրականացումը:
Մանրէաբանական հետազոտություների բաժին
Սննդամթերքի անվտանգության հետազոտությունների լաբորատորիայի սննդամթերքի մանրէաբանական հետազոտություների բաժինը հագեցված է նորագույն սարքավորումներով (BacTrac-մանրէաբանական անալիզատոր, կենսաանվտանգության պահարաններ, ավտոկլավներ, խորը սառեցման (-80oC) սառցարաններ, թերմոստատներ, գաղութների հաշվիչներ, մանրադիտակներ): Բաժնում աշխատում են բազմաթիվ տեղական և միջազգային վերապատրաստումների փորձ ունեցող պրոֆեսիոնալ մասնագետներ, որոնց կոմպետենտությունը ստուգվում է պարբերաբար իրականացվող միջլաբորատոր համեմատական փորձարկումներին (PT) մասնակցությամբ: Բաժինն իրականացնում է փորձարկումներ ինչպես դասական, այնպես էլ էքսպրես (արագացված) մեթոդներով:
Սննդամթերքի մանրէաբանական ցուցանիշների հիգիենիկ նորմատիվները ընդգրկում են ախտածին (պաթոգեն) և ոչ ախտածին (ոչ պաթոգեն) միկրոօրգանիզմների հետևյալ խմբերը՝
-
սանիտարացուցադրական, որոնց շարքին դասվում են մեզոֆիլ աէրոբ և ֆակուլտատիվ անաէրոբ մանրէների քանակը (ՄԱՖԱՄ), աղիքային ցուպիկի խմբի մանրէներ՝ կոլիձևեր (ԱՑԽՄ), Enterobacteriaceae ցեղի մանրէներ, էնտերոկոկեր
-
պայմանական-ախտածին մանրէներ՝ Е. coli (աղիքային ցուպիկ), S. aureus (ոսկեգույն ստաֆիլակոկ), Proteus, В. Cereus ցեղերի մանրէներ, սուլֆիտառաջացնող կլոստրիդիաներ, Vibrio parahaemolyticus,
-
ախտածին մանրէներ, այդ թվում՝ սալմոնելաներ և Listeria monocytogenes,
-
Yersinia ցեղի և այլ ախտածին մանրէներ՝ սննդամթերքի արտադրության տարածքում տիրող համաճարակային իրավիճակին համապատասխան,
-
փչացման մանրէներ՝ խմորասնկեր և բորբոսասնկեր, կաթնաթթվային մանրէներ,
-
մերանային միկրոֆլորայի մանրէներ և պրոբիոտիկ մանրէներ (կաթնաթթվային մանրէներ, խմորասնկեր, բիֆիդոմանրէներ, լակտոբացիլներ և այլն)՝ տեխնոլոգիական միկրոֆլորայի նորմավորվող մակարդակով մթերքում և պրոբիոտիկ մթերքներում:
Սննդամթերքի անվտանգության մանրէաբանական ցուցանիշների նորմավորումը մանրէների խմբերի մեծամասնության համար իրականացվում է այլընտրանքային սկզբունքով. նորմավորվում է մթերքի այն զագվածը, որում չեն թույլատրվում աղիքային ցուպիկի խմբի մանրէները, պայմանական ախտածին մանրէների մեծամասնությունը, ինչպես նաև ախտածին մանրէները, այդ թվում՝ սալմոնելաները և Listeria monocytogenes: Մյուս դեպքերում նորմատիվը արտացոլում է 1 գ (մլ) մթերքում գաղութառաջացնող միավորների քանակը (ԳԱՄ/գ կամ ԳԱՄ/մլ):
Պահածոյացված սննդամթերքի անվտանգության չափանիշներ (արդյունաբերական մանրէազերծվածություն) են հանդիսանում տվյալ պահածոների տեսակի համար սահմանված պահպանման ջերմասիճանի պայմաններում զարգանալու և բազմանալու հնարավորություն ունեցող մանրէների և մարդու առողջության համար վտանգավոր մանրէների և դրանց թույների բացակայությունը պահածոյացված սննդամթերքում:
Ֆիզիկաքիմիական, թունաբանական և անասնաբուժասանիտարական հետազոտությունների բաժին
Արտադրանքի՝ այդ թվում նաև սննդամթերքի որակը մի շարք հատկությունների ամբողջություն է, որը տվյալ արտադրանքին հնարավորություն է տալիս բավարարելու նախապես սահմանված կամ ենթադրելի պահանջմունքները: Որակի բարելավման հետ արտադրանքի սպառողական արժեքը մեծանում է: Սննդամթերքի որակի հետազոտման մեթոդները իրենց բնույթով և իրականացվող փորձարկումներով բաժանվում են զգայաբանական (օրգանոլեպտիկ) եւ լաբորատոր մեթոդների, ինչով և զբաղվում է բաժինը:
Բաժնում իրականացվող արտադրանքի որակի զգայաբանական (օրգանոլեպտիկ) և ֆիզիկաքիմիական լաբորատոր փորձարկումները կատարվում են համաձայն գործող նորմատիվ փաստաթղթերի, արտադրողի կողմից ներկայացված տեխնիկական պայմանների և պատվիրատուի կողմից ներկայացված այլ մեթոդների: Ֆիզիկական եւ ֆիզիկաքիմիական հետազոտական մեթոդները ունեն մի շարք առավելություններ` պայմանավորված դրանց իրականացման արագությամբ եւ մատչելիությամբ: Բաժնում փորձարկումներն իրականացվում են ինչպես ըստ դասական ֆիզիկաքիմիական մեթոդների, այնպես էլ նորագույն սարքավորումների կիրառման վրա հիմնված ժամանակակից մեթոդներով: Բաժինը գերհագեցած է այնպիսի գերզգայուն սարքավորումներով, որոնք բացառիկ են ՀՀ, որոշ դեպքերում էլ տարածաշրջանային մակարդակով: Վերջիններս առանձնանում են իրենց արագությամբ, ճշգրտությամբ և բազմաֆունկցիոնալությամբ: Կարելի է առանձնացնել: Ամինաթթվային անալիզատորը, որը հնարավորություն է տալիս որոշել սննդամթերքի ամբողջական սպիտակուցային բաղադրակազմը մեկ փորձի շրջանակներում: Իոնային քրոմատագրման սարքը, որի միջոցով որոշվում է սննդամթերքի և ջրի կատիոնների (կալիում, նատրիում, կալցիում, մագնեզիում, ստրոնցիում, ամոնիում) ու անիոնների (ֆտորիդ, քլորիդ, նիտրատ, նիտրիտ, սուլֆատ) բաղադրակազմը: Բաժնի հիմնական գործառույթներից է նաև անասնաբուժասանիտարական փորձաքննությունների (ԱՍՓ) իրականացումը, որն իրենից ներկայացնում է զգայաբանական (օրգանոլեպտիկ) և մանրադիտակային (բակտերիոսկոպիկ) հետազոտությունների ամբողջություն: ԱՍՓ-ի դերը կարևորվում է հատկապես մսամթերքի լաբորատոր փորձարկման տեսանկյունից՝ ինֆեկցիոն և ինվազիոն հիվանդությունների կանխարգելման նպատակով: